NOTA PRAEVIA

Lettere Latine



Proclamata mense Februario 1849 Republica Romana extemplo initiabatur suppressio monasteriorum et persecutio sacerdotum. Die 22 eiusdem mensis in nosocomio ad Sanctum Spiritum Vincentio categorice declarabatur eum debere cum suis statim recedere a nosocomio nulloque sub praetextu redire aut alibi ullam habere cum militibus relationem. Dicendo per viam cum suis hymnum Te Deum, quod facere solebat in adversis, in sacrum recessum ad SS. Salvatorem reversus est. Hic per tres dies dedit congregatis exercitia spiritualia, quibus peractis De Geslin, natione Gallum, constituit Rectorem s. recessus, socios formidine plenos consolatus est dicens: ponamus personam nostram et pauca nostra sub potenti Beatae Mariae Virginis protectione, ipsa providebit, et ex obedientia erga suum confessarium clam se recepit in collegium Hibernicum ad S. Agatham Gothorum, ubi usque ad diem 14 Julii latuit. interim Vaccari saecularibus indutus vestibus sub ficto nomine medici circuens spirituales fidelium sanabat infirmitates.
De inquisitione die 2 Maii in collegio Hibernico a republicanis facta Vincentius Cardinali Lambruschini scribit «eos venisse cum proposito trahendi quemlibet ibi absconditum in plateam de Monte Cavallo, ut telo occideretur. Et de facto furiose currebant vel per loca subterranea et celata. Cardinalis Castracane de cubiculo currens in cubiculum evasit periculum. In cubiculum, ubi ego nihil sciens de inquisitione eram, non venerunt» (Lett. 1581). Recessus ad SS. Salvatorem bis subire debuit inquisitionem republicanorum. Prima vice prudentem simul et energicum modum agendi Rectoris De Geslin verentes nihil damni intulerunt, et secunda vice nonnisi duas campanas ecclesiae asportarunt. Munus Rectoris recessus circa finem mensis Aprilis Orlandi assumpsit, quia De Geslin, cum